Përtëritja e Sionit
1 Le të gëzojë shkretëtira dhe toka e thatë,
le të ngazëllejë stepa e të lulëzojë si trëndafili.
2 Le të lulëzojë ngado,
të gëzojë e të ngazëllejë!
Do t'i jepet lavdia e Libanit,
madhështia e Karmelit dhe e Sharonit.
Lavdinë e Zotit do të shohin,
madhështinë e Perëndisë tonë.
3 Forcojini duart e stërmunduara,
jepuni forcë gjunjëve të këputura.
4 Thuajuni atyre që i ka lëshuar zemra:
«Jini të fortë e frikë mos kini!
Ja, Perëndia juaj po vjen të marrë hak!
Po mbërrin shpagimi i Perëndisë!
Ai po vjen për t'ju shpëtuar!».
5 Atëherë të verbërve do t'u çelen sytë,
të shurdhërve do t'u hapen veshët,
6 i çali do të kërcejë si dreri,
gjuha e shurdhmemecit do të brohorasë,
se në shkretëtirë do të gëlojnë ujërat,
përrenjtë do të vërshojnë në tokë të thatë.
7 Toka e shkrumbuar do të bëhet liqen,
vendi i thatë burim ujërash.
Në strofullin ku strukeshin çakejtë,
do të rritet kallami e xunkthi.
8 Atje do të ketë një udhë të gjerë,
një udhë që do të quhet «Udha e Shenjtë»
dhe i papastri nëpër të s'do të kalojë.
Do të jetë vetëm për ata që udhës së drejtë ecin,
dhe të marrët s'kalojnë dot nëpër të.
9 Luan atje s'do të ketë,
bishë grabitqare s'do të shkelë atje.
Jo, ato s'do të kalojnë nëpër të,
por do të kalojnë vetëm të shpenguarit.
10 Do të kthehen të shpëtuarit prej Zotit,
në Sion do të vijnë me britma gëzimi,
ngazëllimi i përhershëm do t'ua çelë fytyrën,
do t'i pushtojë hareja e ngazëllimi,
trishtimi e psherëtima larg do të degdisen.
1 Shkretëtira edhe dheu i thatë do të gëzonenë për ato, edhe shkretëtira do të ngazëllonetë, do të lulëzonjë posi triandafil.
2 Do të jetë plot me lule, po edhe do të gëzonetë tuke gëzuar’ e tuke brohorijturë; lavdia e Livanit do t’i epet’ asaj, edhe nderi i Karmillit e i Sharonit, këta (vënde) do të shohënë lavdin’ e Zotit, (edhe) madhërin’ e Perëndisë s’anë.
3 Forconi duart’ e dobëta, edhe shëndoshni gjunjt’ e prerë.
4 Thoni atyre që u është frikësuarë zëmëra: Merrni fuqi, e mos u frikësoni, na Perëndia juaj tek do të vinjë për të marrë shpagim, Perëndia për të dhënë shpagim; ay do të vinjë, e do t’u shpëtonjë juve.
5 Atëherë syt’ e të verburet do të hapenë, edhe veshët’ e të shurdhuret do të dëgjonjënë.
6 Atëherë i çali do të këcenjë posi drë, edhe gluha e të pagojit do të këndonjë, sepse ndë shkretëtirët do të buronjën’ ujëra, edhe ndë vënt të shkretë rryme (ujërash).
7 Edhe dheu i thatë do të bënetë lëqe, edhe dheu i eçim (do të bënetë) gurra uji; ndë vënt të çakajvet, tek dirgjeshinë, do (të jetë) barishtë me kallama e me kulmakë.
8 Edhe atie do të jetë dhrom e udhë, edhe do të kluhetë Udh’ e shënjtëruarë; edhe i ndyri nukë do të shkonjë ndëpër atë, po do të jetë për ata, udhëtari e të marrëtë nukë do të humbasën’ udhënë.
9 Leon nukë do të ket’ atie, edhe ndonjë bishë që rrëmben nukë do të hipënjë atie, nukë do të gjëndet’ atie, po të shpërblyeritë do të ecënjën’ (atie).
10 Edhe të shpërblyerit’ e Zotit do të këthenenë, edhe do të vinjënë me brohori ndë Sionë, edhe gëzimi i përjetëshim (do të jetë) mbi kryet t’atyreve. Ky gëzim e ngazëllim do të trashëgonjënë, edhe hidhërimi e psherëtima do t’ ikënjënë.