Predikimi i Gjon Pagëzorit
(Mk 1.1-8Lk 3.1-9, Lk 15-17Gjn 1.19-28)1 Ato ditë erdhi Gjon Pagëzori që predikonte në shkretëtirën e Judesë. 2 Ai thoshte: «Pendohuni, se mbretëria e qiejve është afër». 3 Ky është ai për të cilin është folur nga profeti Isai që ka thënë:
një zë thërret në shkretëtirë:
bëni gati udhën për Zotin,
drejtoni shtigjet e tij.
4 Gjoni ishte veshur me një rrobë prej leshi deveje dhe mbante një brez lëkure rreth ijëve. Ai ushqehej me karkaleca e mjaltë të egër.
5 Atëherë njerëz nga Jerusalemi, nga gjithë Judeja e nga mbarë krahina e Jordanit shkonin tek ai 6 dhe, duke rrëfyer haptazi mëkatet e tyre, pagëzoheshin prej tij në lumin Jordan. 7 Kur Gjoni pa se shumë farisenj e saducenj vinin për t'u pagëzuar tek ai, u tha: «Pjellë nepërkash! Kush ju mësoi t'i ikni zemërimit që po vjen? 8 Jepni fryte të denja pendimi 9 dhe mos mendoni se do t'i thoni vetes: kemi për atë Abrahamin. Unë po ju them se Perëndia mund t'i japë bij Abrahamit edhe nga këta gurë. 10 Sëpata gjendet tashmë te rrënjët e pemëve. Çdo pemë që nuk jep fryte të mira do të pritet e do të hidhet në zjarr.
11 Unë po ju pagëzoj me ujë, që të pendoheni, por pas meje vjen një që është më i fortë se unë, të cilit nuk jam i denjë as t'i zgjidh sandalet. Ai do t'ju pagëzojë me Shpirtin e shenjtë e me zjarr. 12 Ai e mban në dorë terploten dhe do të ndajë grurin nga kashta. Grurin do ta mbledhë në grunar, ndërsa kashtën do ta djegë në një zjarr që nuk shuhet kurrë».
Pagëzimi i Jezuit
(Mk 1.9-11Lk 3.21-22)13 Atëherë Jezui erdhi nga Galilea në Jordan te Gjoni për t'u pagëzuar prej tij. 14 Por Gjoni e kundërshtoi e i tha: «Jam unë ai që duhet të pagëzohem prej teje, e ti vjen tek unë?». 15 Jezui iu përgjigj: «Lëre për tani, se kështu duhet, që të përmbushim tërë drejtësinë». Dhe Gjoni pranoi. 16 Pasi u pagëzua, Jezui doli menjëherë nga uji. Dhe ja, iu hapën qiejt dhe ai pa Shpirtin e Perëndisë duke zbritur në trajtë pëllumbi e duke ardhur tek ai. 17 Atëherë u dëgjua një zë nga qielli që tha: «Ky është Biri im i dashur, me të cilin jam i kënaqur».
1 Edhe nd’ ato dit vien Joann Pagëzori tuke leçiturë ndë shkretëtirët të Judhesë, e tuke thënë:
2 Pendohi, sepse u afrua mbëretëria e qiejevet.
3 Sepse kyj ësht’ ay që u fol nga profiti Isaj, që thotë: “Zëri ati që bërtet ndë shkretëtirët. Bëni gati udhën’ e Zotit: bëni rrugat’e ati të drejta.”
4 Edhe ay Ioanni kishte të veshurit’ e ti prej qimesh kamillësë, edhe bres të lëkurtë për mesin’ e ati; edhe ushqimi ati ishte karkaleca e mialt’ i egrë.
5 Atëhere dilte jashtë tek ay Jerusalimi edhe gjithë Judhea, edhe gjith’ anëtë qark Jordhanit.
6 Edhe pagëzoneshinë ndë Jordhan nga ay, tuke rrëfyerë fajet’ e tyre.
7 Edhe kur pa se po vinjënë shumë vetë nga Farisejt’ e nga Sadhdhuqejtë mbë pagëzimt të ti, u tha atyre: “Këlysh nepërkash, cili u dëfteu juve të ikni nga zemërimi që vien?
8 Bëni pra pemë të vëjetura për pendim.
9 Edhe mos u duketë të thoni me vetëhenë tuaj, se “Atë kemi Avraamnë”; sepse po u them juve, se Perëndia munt të ngrerë dielm Avraamit nga këta gurë.
10 E ndashti edhe sopata rri përmbi rrëzët të drurëvet; çdo dru pra që s’bën pemë të mirë pritetë, edhe hidhetë ndë ziarr.
11 Un’ u pagëzonj juve me ujë për pendim; po ay që vien pas meje është më i fortë se unë, të cilit nukë jam i zoti t’i mbanj këpucëtë; ay do t’u pagëzonjë juve me Frymë të Shënjtëruar’ e me ziarr.
12 Ay ka lopatënë ndë dorë të ti, edhe do të qëronjë lëmën’ e ti, edhe do të mbëledhë grurin’ e ti ndë grunart, po kashtënë do ta diegë me ziarr të pashuarë.”
13 Atëherë Jisuj vien nga Galilea ndë Jordhan te Joanni, që të pagëzonetë nga ai.
14 Po Joanni e ndalon atë, tuke thënë: “Unë kam nevojë të pagëzonem prej teje, e ti vien tek unë?”
15 Edhe Jisuj u përgjeq e i tha: “Le ndashti; sepse kështu na gjan neve të mbushmë çdo drejtëri.” Atëhere e lë atë.
16 Edhe Jisuj si u pagëzua përnjëherë dolli nga ujëtë; edhe ja tek u hapnë qiejetë, edhe pa Frymën’ e Perëndisë tuke sbriturë posi pëllump, e tuke ardhurë mbi atë.
17 Edhe ja tek u dëgjua një zë nga qiejetë që thoshte: “Kyj është biri im i dashurë, që e kam pëlqyerë.”