Predikimi i Gjon Pagëzorit
(Mt 3.1-12Mk 1.1-8Gjn 1.19-28)1 Në vitin e pesëmbëdhjetë të mbretërimit të Cezar Tiberit, kur Ponc Pilati ishte qeveritar i Judesë dhe Herodi, tetrark i Galilesë, ndërsa vëllai i tij, Filipi, tetrark i krahinës së Ituresë e Trakonitidës, kur Lisania ishte tetrark i Abilenës 2 dhe kryepriftërinj ishin Hanahu e Kajafa, Gjonit, birit të Zakarisë, iu dha fjala e Perëndisë në shkretëtirë. 3 Ai shkoi në mbarë krahinën përreth Jordanit dhe u predikonte njerëzve të pendoheshin e të pagëzoheshin, që t'u faleshin mëkatet. 4 Siç është shkruar në librin e profetit Isai:
një zë thërret në shkretëtirë:
bëni gati udhën për Zotin,
drejtoni shtigjet e tij.
5 Çdo luginë le të mbushet
e çdo mal e kodër
le të rrafshohet.
Drejtoni udhët e shtrembra
e rrafshoni rrugët e ashpra.
6 Çdo njeri do ta shohë
shpëtimin e Perëndisë.
7 Gjoni u thoshte turmave që vinin për t'u pagëzuar tek ai: «Pjellë nepërkash! Kush ju mësoi t'i ikni zemërimit që po vjen? 8 Jepni fryte të denja pendimi e mos filloni t'i thoni vetes: kemi për atë Abrahamin. Unë po ju them se Perëndia mund t'i japë bij Abrahamit edhe nga këta gurë. 9 Që tani pemëve u është vënë sëpata në rrënjë. Çdo pemë që nuk jep fryt të mirë, pritet e hidhet në zjarr». 10 Turmat e pyetën: «Ç'duhet të bëjmë, atëherë?». 11 Gjoni u përgjigj: «Kush ka dy tunika, le t'ia japë njërën atij që nuk ka. Ai që ka për të ngrënë, le të veprojë po kështu». 12 Erdhën për t'u pagëzuar edhe tagrambledhësit e i thanë: «Mësues, ç'duhet të bëjmë?». 13 Ai u tha: «Mos mblidhni më shumë nga ç'ju është ngarkuar». 14 Edhe disa ushtarë e pyetën: «Po ne, ç'duhet të bëjmë?». Gjoni u tha: «Mos i merrni askujt gjë me dhunë e duke mashtruar, por kënaquni me pagën tuaj».
15 Populli ishte në pritje dhe të gjithë mendonin në zemrat e tyre se mos Gjoni ishte Krishti. 16 Atëherë Gjoni u tha: «Unë po ju pagëzoj me ujë, por po vjen dikush më i fuqishëm se unë, të cilit unë nuk jam i denjë as t'i zgjidh sandalet. Ai do t'ju pagëzojë me Shpirtin e shenjtë e me zjarr. 17 Ai e mban në dorë terploten për ta ndarë grurin nga kashta. Grurin do ta mbledhë në grunarin e tij, ndërsa kashtën do ta djegë në zjarrin që nuk shuhet kurrë».
18 Gjoni ia shpallte lajmin e mirë popullit edhe me shumë porosi të tjera. 19 Herod Tetrarku, të cilin Gjoni e kishte qortuar për shkak të Herodiadës, gruas së vëllait të vet, si edhe për të gjitha të këqijat që kishte bërë, 20 bëri edhe këtë të keqe: e futi Gjonin në burg.
Pagëzimi i Jezuit
(Mt 3.13-17Mk 1.9-11)21 Kur u pagëzua gjithë populli, u pagëzua edhe Jezui dhe kur po lutej, u hap qielli 22 e mbi të zbriti Shpirti i shenjtë me trajtë trupore si pëllumb. Atëherë u dëgjua një zë nga qielli: «Ti je Biri im i dashur. Me ty jam i kënaqur».
Breznitë e Jezuit
(Mt 1.1-17)23 Kur Jezui filloi shërbesën, ishte rreth tridhjetë vjeç. E pandehnin të birin e Jozefit. Jozefi ishte biri i Eliut, 24 të birit të Matatit, të birit të Levit, të birit të Melkiut, të birit të Janait, të birit të Jozefit, 25 të birit të Matatisë, të birit të Amosit, të birit të Naumit, të birit të Esliut, të birit të Nagait, 26 të birit të Mahatit, të birit të Matatisë, të birit të Semeinit, të birit të Josekut, të birit të Jodait, 27 të birit të Johananit, të birit të Resës, të birit të Zorobabelit, të birit të Salatielit, të birit të Nerit, 28 të birit të Melkiut, të birit të Adiut, të birit të Kosamit, të birit të Elmadamit, të birit të Erit, 29 të birit të Jozuehut, të birit të Eliezerit, të birit të Jorimit, të birit të Matatit, të birit të Levit, 30 të birit të Simeonit, të birit të Judës, të birit të Jozefit, të birit të Jonamit, të birit të Eliakimit, 31 të birit të Meleas, të birit të Menait, të birit të Matatait, të birit të Natamit, të birit të Davidit, 32 të birit të Jeseut, të birit të Jobedit, të birit të Boozit, të birit të Salait, të birit të Naasonit, 33 të birit të Aminadabit, të birit të Adminit, të birit të Arnit, të birit të Esromit, të birit të Faresit, të birit të Judës, 34 të birit të Jakobit, të birit të Isakut, të birit të Abrahamit, të birit të Tarait, të birit të Nahorit, 35 të birit të Serukut, të birit të Ragaut, të birit të Falekut, të birit të Eberit, të birit të Salait, 36 të birit të Kainamit, të birit të Arfaksadit, të birit të Semit, të birit të Noeut, të birit të Lamekut, 37 të birit të Metusalait, të birit të Enokut, të birit të Jaretit, të birit të Maleleelit, të birit të Kainamit, 38 të birit të Enout, të birit të Setit, të birit të Adamit, të birit të Perëndisë.
1 Edhe mbë të pesë-mbë-dhietinë vit të qyvernisë Tiverit Qesarit, kur ishte Pillat Pontiu qyvernitar i Judhesë, edhe Irodhi katrurdhëratës i Galilesë, e Filippi, i vëllai katrurdhëratës i Iturësë edhe vëndit Trahonitisë,
2 Edhe Lysania ndë dit të kryepriftëret Anësë e Kajafësë, erdhi fjal’ e Perëndisë mbë Joannë, të birin’ e Zaharisë. ndë shkretërirët.
3 Edhe erdhi ndë gjithë vëndinë rrotullë Jordhanit, tuke leçiturë pagëzim pendimi për ndëjesën’ e fajevet;
4 Sikundrë është shkruarë ndë vivllët të fialëvet të profitit Isai, që thotë: ”Zër’ i ati që bërtet ndë shkretëtirët, Bëni gati udhën’ e Zotit, bëni të drejta rrugat’e ati.
5 Çdo shpellë do të mbushetë, edhe çdo mal e kodrë do të ungjetë, edhe të shtrëmburatë do të bënenë të drejta, edhe udhët’ e ashpëra do të bënenë të buta;
6 Edhe çdo mish do të shohë shpëtimin’ e Perëndisë”.
7 U thoshte pra gjëndëjesë që shkoninë jashtë të pagëzoneshinë prej ati: “Këlysh’ nepërkash, kush u dëfteu juve të ikëni prej zemërimit që ka për t’ ardhurë?
8 Bëni pra pemë të vëjyera për pendiminë, edhe mos ziri të thoni me vetëhe, se: Kemi Atë Avraaminë; sepse po u them juve, se Perëndia munt t’i ngjalljë djem Avraamit prej këtyre gurëve.
9 Edhe tashti gjëndetë edhe sëpata ndë rrëzët të druvet; çdo dru pra që nukë bën pemë të mirë, pritetë edhe hidhetë ndë ziarr.”
10 Edhe gjëndëja e pyesninë, tuke thënë: “Ç’do të bëjmë pra?”
11 Edhe ay u përgjeq e u tha atyre: “Kush të ketë dy palë rrobe le t’i apë ati që s’ka; edhe kush të ketë të ngrëna, le të bëjë kështu.”
12 Erdhë edhe kurmerqarë që të pagëzoneshinë, edhe i thanë: “Mësonjës, ç’do të bëjmë?”
13 Edhe ay u tha atyre: “Mos merrni gjë më tepërë, veç asaj që ësht’ urdhëruarë mbë ju.”
14 Edhe e pyesnin’ edhe luftëtarëtë, tuke thënë: “Edhe na ç’do të bëjmë?” Edhe u tha atyre: “Mos bëni dëm, as mos kallëzoni keq për njeri; edhe le t’u jenë mjaft pagatë tuaja.”
15 Edhe llauzi passi ishte tuke priturë edhe të gjithë mendoneshinë ndë zemërat të tyre për Joannë, vallë mos ësht’ ay Krishti,
16 Joanni u përgjeq të gjithëve, tuke thënë: “Un’ u pagëzonj juve me ujë; po vien më i forti se unë, të cilit s’jam i zoti t’i sgjith rrypn’ e shollavet; ay do t’u pagëzonjë juve me Frymë të Shënjtëruar’ e me ziarr;
17 I cili mban lopatënë ndë dorë të ti, edhe do të qëronjë lëmën’ e ti, edhe do të mbëledhë grurëtë ndë grunar të ti, edhe do të diegë kashtënë ndë ziarr të pashuarë.”
18 Edhe tuke mësuarë i epte zën’ e mirë llauzit për shumë të tiera punë .
19 Edhe Irodhi katrurdhëratësi, passi qërtonej prej ati për Irodhiadhënë, gruan’ e [Filippit] të vëllat, edhe për gjith’ ato të këqia që pat bërë Irodhi,
20 Shtoj edhe këtë përmbi të gjitha, edhe mbylli Joannë ndë burgut.
21 Edhe gjithë llauzi passi u pagëzua, edhe Jisuj kur ishte tuke pagëzuar’ e tuke falurë,
22 U hap qielli, edhe Frym’ e Shënjtëruarë sbriti mbi atë me një farë trupi posi pëllump, edhe erdhi një zë nga qielli, tuke thënë: “Ti je biri im i dashuri, tyj të pëlqeva.”
23 Edhe ay Jisuj zuri të jetë afro tri-dhietë vieç, që ishte (si e kujtoninë bota ) i bir’ i Josifit, i Iliut,
24 I Matthatit, i Leviut, i Melhiut,
25 I Annajt, i Josifit, i Mattathiut, i Amosit, i Naumit, i Esliut,
26 I Naggajt, i Maathit, i Matathiut, i Semejt, i Josifit, i Judhësë,
27 I Ioannajt, i Risajt, i Zororvavelit, i Sallathiilit, i Niriut,
28 I Melhiut, i Adhdhiut, i Kosamit,
29 I Elmodhamit, i Irit, i Josiut, i Eliezeret, i Jorejmit, i Matthatit,
30 I Leviut, i Simeonit, i Judhesë, i Josifit,
31 I Jonanit, i Eliaqejmit, i Meleajt, i Majnanit, i Mattathajt,
32 I Nathanit, i Dhavidhit, i Jesseut, i Ovidhit, i Voozit, i Sallmonit, i Naasonit,
33 I Amminadhavit, i Aramit, i Esromit,
34 I Faresit, i Judhesë, i Jakovit, i Isaakut, i Avraamit, i Tharajt,
35 I Nahorit, i Saruhut, i Ragavit, i Falekut, i Everit, i Sallajt,
36 I Kajnanit, i Arraksadhit, i Simit, i Noesë,
37 I Llamehut, i Mathusallësë, i Enohut, i Iaredhit, i Malelejlit,
38 I Kajnanit, i Enosit, i Sithit, i Adhamit, i Perëndisë.