Barrët e njëri-tjetrit
1 Vëllezër, nëse ndokush kapet në faj, ju që keni Shpirtin e shenjtë ndreqeni atë me shpirtbutësi, por ruhuni se mos tundoheni edhe ju vetë. 2 Mbajini barrët e njëri-tjetrit dhe kështu do të përmbushni ligjin e Krishtit.
3 Sepse, nëse ndonjëri mendon se është dikush, duke mos qenë askush, ai mashtron veten. 4 Secili të shqyrtojë veprat e veta e pastaj të krenohet vetëm me veten e jo me dikë tjetër. 5 Sepse çdonjëri do të mbajë barrën e vet.
6 Kush mëson fjalën e Perëndisë, le të ndajë me mësuesin e vet të gjitha të mirat e tij.
7 Mos t'ju gënjejë mendja: Perëndia nuk vihet në lojë. Ç'të mbjellë njeriu, atë edhe do të korrë. 8 Kush mbjell sipas dobësisë së vet njerëzore, prej saj do të korrë shkatërrimin, ndërsa kush mbjell sipas Shpirtit, do të korrë prej tij jetën e amshuar. 9 Le të mos lodhemi duke bërë të mirën, sepse, po të mos dorëzohemi, do të kemi edhe të korra në kohën e duhur. 10 Prandaj, sa të kemi kohë, të punojmë për të mirën e të gjithëve, sidomos të vëllezërve në besim.
Paralajmërimi i fundit
11 Shikoni me ç'shkronja të mëdha ju shkrova me dorën time.
12 Ata që ju detyrojnë të rrethpriteni duan të dalin mirë para njerëzve vetëm që të mos përndiqen për kryqin e Krishtit. 13 Madje as vetë ata që rrethpriten nuk e zbatojnë ligjin, por duan që ju të rrethpriteni, që të mburren me ju. 14 Sa për mua, unë nuk dua të krenohem me asgjë tjetër, përveçse me kryqin e Zotit tonë Jezu Krisht, përmes të cilit jam i vdekur në kryq për sa i përket botës dhe bota për sa më përket mua.
15 Sepse nuk vlejnë gjë as rrethprerja, as parrethprerja, por vlen vetëm krijesa e re. 16 Të gjithë ata që do të ndjekin këtë rregull, paçin paqe e mëshirë, ata dhe Izraeli i Perëndisë.
17 Që tani e tutje asnjeri të mos m'i shtojë mundimet, sepse unë mbart shenjat e plagëve të Jezuit në trupin tim.
18 Hiri i Zotit tonë Jezu Krisht qoftë me shpirtin tuaj, o vëllezër! Amen!
1 O vëllezër, edhe ndë pastë rënë ndonjë njeri mbë ndonjë faj, ju që jeni të frymësë ndërtoni të tillinë me frymë butësire; tuke vënë re vetëhenë tënde, mos të ngitesh edhe ti.
2 Mbani barrëtë njëri tiatrit, edhe kështu mbushni nomin’ e Krishtit.
3 Sepse ndë i duketë ndonjërit se diç është, ndonëse s’është gjë, gënjen vetëhen’ e ti.
4 Po gjithësecili le të vështronjë punën’ e ti, edhe atëhere do të ketë të mburruritë për vetëhen’ e ti e jo për tiatrinë.
5 Sepse gjithësecili do të mbajë barrën’ e ti.
6 Edhe ay që ësht’ i mësuarë ndë fialët, le ta bënjë piesëtar ndë gjithë të mirat atë që mëson.
7 Mos gënjehi; Perëndia nukë përbuzetë; sepse ç’të mbiellë njeriu, atë edhe do të korrë;
8 Sepse ay që mbiell ndë mish të ti, do të korrë prishëje prej mishit; po ay që mbiell ndë Frymët, do të korrë jetë të pasosurë prej Frymësë.
9 Le të mos lodhemi pra tuke bërë të mirënë, sepse ndë mos u lothshim, do të korrëmë ndë kohë të saj.
10 Përandaj gjersa kemi kohë, le të punojmë të mirënë mbë të gjithë, po më fort mb’ ata që jemi me një besë.
11 Shikoni çfarë kartë të madhe u shkrova juve me dorënë time.
12 - Sa duanë të dukenë të mirë ndë misht, këta u ngusënë juve të rrethpriteni, vetëmë që të mos ndiqenë për kryqin’ e Krishtit.
13 Sepse as ata që janë rrethprerë s ruanjënë nominë, po duanë të rrethpriteni ju, që të mburrenë ndë misht tuaj.
14 Po për mua qoftë lark të mburrem për tiatërë gjë, veç për kryqin’ e Zotit tënë Jisu Krishtit, që me anë t’ati është kryqëzuarë bota tek unë, edhe unë te bota.
15 Sepse mbë Jisu Krishtinë as rrethpresëja ka fuqi, as parrethpresëja, po kriesa e re.
16 Edhe sa ecënjënë pas këti rregulli, qoftë paqtim edhe përdëllim mb’ ata, edhe mbë Israilin’ e Perëndisë.
17 Ndashti e paskëtaj asndonjë le të mos më mundonjë: sepse unë mbanj shenjet’ e Zotit Jisu ndë trup tim.
18 Hiri i Zotit tënë Jisu Krishtit qoftë bashkë me frymënë tuaj, o vëllezër. Amin.