1 Allilluja. Lavduroni emërin’ e Zotit, lavduroni, ju shërbëtorët’ e Zotit,
2 që rrini ndë shtëpi të Zotit, ndë hobore të shtëpisë Perëndisë t’ënë.
3 Lavduroni Zonë, se Zoti ësht’ i mirë; psallni emërit ati, se është mirë.
4 Se Zoti cgjodhi Jakovë për vete, Israillë për thesoren’ e ti.
5 Sepse un’ e ngjoha, se Zoti ësht’ i math, edhe Zoti ynë është përmbi gjithë perëndirat.
6 Zoti bëri gjithë sa deshi ndë qiellt, e ndë dhet, ndë detet, e ndë gjith’ avyssat.
7 Hipën retë prej anësë dheut, bën vetëtimëra për shi, nxier erëra prej thesorevet tia.
8 I cili goditi diemt’ e paralindurë të Misirit që nga njieriu gjer mbë bagëtinë,
9 dërgoj shenjë e punë të frikshime ndë mest tënt, o Misirë, mbi Faraonë, edhe mbi gjithë shërbëtorët’ e ati.
10 I cili goditi kombe të mëdhenj, edhe vrau mbëretrë të fortë:
11 Sionë, mbëretn’ e Amorevet, edhe Ogunë, mbëretn’ e Vashanit, edhe gjithë mbëretërit’ e Hanaanit.
12 Edhe dha dhenë e atyreve trashëgim, trashëgim mbë Israillë llausn’ e ti.
13 O Zot, emëri yt është për gjithë jetënë, edhe kujtimi yt, o Zot, bres pas brezi.
14 Se Zoti do të gjykonjë llausn’ e ti, edhe do të ngushëllonetë për shërbëtorët e ti.
15 Idhullat’ e kombevet janë ergjënt’ e ar, punë duarsh njieriu.
16 Gojë kanë, e nukë flasënë, sy kanë, e nukë shohënë,
17 veshë kanë, e nukë gjegjenë, as kanë frymë ndë gojët të tyre.
18 Posi ato u bëfshinë ata që bënjënë ato, kushdo që ka shpëresë mbë ato!
19 O shtëpi e Israillit, bekoni Zonë; o shtëpi e Aaronit, bekoni Zonë;
20 o shtëpi e Leviut, bekoni Zonë; ju që i kini frikë Zotit, bekoni Zonë.
21 I bekuarë qoftë Zoti prej Sionësë, ay që rri ndë Jerusallimë. Allilluja.
1 Aleluja! Lavdëroni emrin e Zotit,
lavdërojeni, o shërbëtorë të Zotit,
2 ju që rrini në shtëpinë e Zotit,
në oborret e shtëpisë së Perëndisë sonë.
3 Lavdërojeni Zotin, se Zoti është i mirë,
këndojini emrit të tij, se është i ëmbël.
4 Zoti e ka zgjedhur Jakobin për vete,
Izraelin si thesarin e tij të çmuar.
5 Unë e di mirë se Zoti është i madh,
se Zoti ynë është mbi gjithë perënditë.
6 Zoti bën gjithçka do,
në qiej e mbi tokë, nëpër dete e në çdo thellësi.
7 Retë i ngre lart nga skajet e tokës,
bën vetëtimat për shiun,
erën nga drithnikët e tij e nxjerr.
8 Ai i vrau të parëlindurit e Egjiptit,
si të njerëzve dhe të kafshëve.
9 Shenja e mrekulli bëri te ti, o Egjipt,
para faraonit e gjithë shërbëtorëve të tij.
10 Shfarosi kombe të shumtë,
vrau mbretër të fuqishëm,
11 Sihonin, mbretin e amoritëve,
dhe Ogun, mbretin e Bashanit,
gjithë mbretëritë e Kanaanit.
12 Tokën e tyre e dha trashëgim,
trashëgim Izraelit, popullit të vet.
13 O Zot, emri yt mbetet përjetë,
kujtimi yt, o Zot, brez pas brezi.
14 Zoti bën drejtësi për popullin e tij
dhe me shërbëtorët e vet është i mëshirshëm.
15 Idhujt e kombeve janë argjend e ar,
vepër e dorës së njeriut.
16 Kanë gojë, por nuk flasin,
kanë sy, por nuk shikojnë,
17 kanë veshë, por nuk dëgjojnë,
e me gojë nuk marrin frymë.
18 Ashtu qofshin edhe ata që i bëjnë,
të gjithë sa kanë besim në ta.
19 Bekoje Zotin, o shtëpi e Izraelit,
bekoje Zotin, o shtëpi e Aronit!
20 Bekoje Zotin, o shtëpi e Levit,
bekojeni Zotin, ju që druani Zotin!
21 Bekuar qoftë Zoti prej Sionit,
ai që banon në Jerusalem! Aleluja!