1 O ju të gjithë që keni et, eni ndër ujërat; edhe ju që nukë keni argjënt, eni, e blini, e hani; po, eni, e blini verë e klumësht, pa argjënt e pa çimim.
2 Përse prishni argjëndinë tuaj (për gjë që) nuk’ (është) bukë? Edhe mundimnë tuaj jo për të ngosurë? Pa dëgjomëni me kujdes, edhe do të hani të mira, edhe shpirti juaj do të gëzonetë ndë të majmit.
3 Ktheni veshnë tuaj, edhe eni tek unë; dëgjoni, edhe shpirti juaj do të rronjë, edhe do të bënj me ju dhiatë të përjetëshime, përdëllimet’ e Dhavidhit besëtarëtë.
4 Na tek ua dhash’ atë gjëndëjevet për deshmim, të parë edhe urdhërtar ndër gjëndëjet.
5 Na tek do të thërreç një komp që nuk’ e njihnje; edhe komba që nukë të njihinë ty do t’ecënjënë te ti, për Zotinë Perëndinë tënt, edhe për Shënjtin’ e Israilit, sepse të lëvdoi.
6 Kërkoni Zonë, gjersa munt të gjëndetë, thërritni atë, gjersa ësht’ afërë.
7 Le të lërë i pabesi udhën’ e ti, edhe i paudhi këshillat’ e tia, edhe le të këthehetë te Zoti, edhe do t’e përdëllenjë, edhe te Perëndia ynë, sepse ay do ta ndëlenjë pa kursim.
8 Sepse këshillat’ e mia nukë janë si këshillatë tuaja, as udhëtë tuaja si udhët’ e mia, thotë Zoti.
9 Po sa të lartë janë qiejetë nga dheu, kështu udhët’ e mia janë më të larta, se udhëtë tuaja, edhe këshillat’ e mia, se këshillatë tuaja.
10 Sepse sikundrë bie shiu edhe bora nga qielli, edhe nukë këthenet’ atie, po ujit dhenë, edhe e bën atë të mbinjë e të nxierrë bima, që t’i apë farë ati që mbiell, edhe bukë ati që ha,
11 kështu do të jetë fiala ime që del nga gola ime: nukë do të këthenetë tek unë e sbrazëtë, po do të mbaronjë dashurimnë t’im, edhe do të vejë mbarë kudo që ta dërgonj.
12 Sepse do të dilni me gëzim, edhe do t’u hiqet’ udha ndë paqtim; malet’ e kodratë do të gjëmonjënë përpara juve nga gëzimi, edhe gjithë drunjt’ e fushësë do të përpiekënë duartë.
13 Ndë vënt të gjëmbit do të dalë qiparis, ndë vënt të hithëthit do të dalë mersinë; edhe këjo do të jetë mbë Zonë për emërë, për shenjë të përjetëshime, (që) nukë do të vdiretë.
Le të vijnë të eturit
1 O ju të gjithë që keni etje,
ejani tek uji!
Kushdo që s'ka para le të afrohet!
Blini drithë e hani!
Ejani e blini verë e qumësht
pa para e pa pagesë!
2 Pse i shpenzoni paratë për çka s'është bukë?
Përse mundoheni për gjëra që s'ngopin?
Dëgjomëni, pra, me kujdes mua
e do të hani çka është e mirë
dhe shpirti juaj do të kënaqet
me gjëra të shijshme.
3 Mbani vesh dhe ejani tek unë!
Dëgjoni e shpirti juaj do të jetojë!
Do të lidh me ju një besëlidhje të amshuar,
mirësinë e patundshme që i premtova Davidit.
4 Ja, atë e bëra dëshmitar për popujt,
prijës e udhëheqës për kombet.
5 Kështu, do të thërrasësh një komb që s'e njihje,
kombe, që s'të njihnin, do të vrapojnë te ti,
për shkak të Zotit, Perëndisë tënd,
të shenjtit të Izraelit, që të madhëroi.
6 Kërkojeni Zotin ndërsa mund të gjendet,
thirrini atij për sa kohë është afër.
7 Le të lërë i ligu udhën e tij,
i paudhi synimet e tij,
le të kthehet te Zoti, që ta mëshirojë,
te Perëndia ynë, që fal me gjithë zemër.
8 Se mendimet e mia nuk janë si tuajat,
as udhët e mia si udhët tuaja,
kumton Zoti.
9 Sa larg është qielli nga toka,
aq larg janë udhët e mia nga udhët tuaja,
mendimet e mia nga mendimet tuaja.
10 Sikurse shiu dhe dëbora zbresin prej qiellit
e më atje nuk kthehen,
por e ujitin dhe e zbrujnë tokën,
e bëjnë të jetë pjellore,
që t'i japë bujkut farën për të mbjellë
e bukën për të ngrënë,
11 ashtu edhe fjala ime, që del prej gojës sime,
s'do të kthehet pas tek unë e zbrazët,
pa ia dalë mbanë gjithçkaje që unë dua
e pa bërë atë për çka e dërgova.
12 Ju do të niseni me gëzim prej andej
e në paqe do të përcilleni.
Para jush malet e kodrat
do të shpërthejnë në britma gëzimi,
të gjitha pemët e fushave
do të trokasin duart.
13 Në vend të ferrave do të rritet qiparisi,
në vend të hithrave do të rritet mërsina.
Kjo do të jetë nder për Zotin,
shenjë e amshuar, që s'do të zhbihet.