1 intellectus Asaph
Adtendite populus meus legem meam
inclinate aurem vestram in verba oris mei
2 aperiam in parabola os meum
eloquar propositiones ab initio
3 quanta audivimus et cognovimus ea
et patres nostri narraverunt nobis
4 non sunt occultata a filiis eorum in generationem alteram
narrantes laudes Domini et virtutes eius
et mirabilia eius quae fecit
5 et suscitavit testimonium in Iacob et legem posuit in Israhel
quanta mandavit patribus nostris nota facere ea filiis suis
6 ut cognoscat generatio altera
filii qui nascentur et exsurgent et narrabunt filiis suis
7 ut ponant in Deo spem suam et non obliviscantur opera Dei
et mandata eius exquirant
8 ne fiant sicut patres eorum generatio prava et exasperans
generatio quae non direxit cor suum
et non est creditus cum Deo spiritus eius
9 filii Effrem intendentes et mittentes arcus
conversi sunt in die belli
10 non custodierunt testamentum Dei
et in lege eius noluerunt ambulare
11 et obliti sunt benefactorum eius
et mirabilium eius quae ostendit eis
12 coram patribus eorum quae fecit mirabilia
in terra Aegypti in campo Taneos
13 interrupit mare et perduxit eos
statuit aquas quasi utrem
14 et deduxit eos in nube diei
et tota nocte in inluminatione ignis
15 interrupit petram in heremo
et adaquavit eos velut in abysso multa
16 et eduxit aquam de petra
et deduxit tamquam flumina aquas
17 et adposuerunt adhuc peccare ei
in ira excitaverunt Excelsum in inaquoso
18 et temptaverunt Deum in cordibus suis
ut peterent escas animabus suis
19 et male locuti sunt de Deo
dixerunt numquid poterit Deus parare mensam in deserto
20 quoniam percussit petram et fluxerunt aquae
et torrentes inundaverunt
numquid et panem potest dare
aut parare mensam populo suo
21 ideo audivit Dominus et distulit
et ignis accensus est in Iacob
et ira ascendit in Israhel
22 quia non crediderunt in Deo
nec speraverunt in salutare eius
23 et mandavit nubibus desuper et ianuas caeli aperuit
24 et pluit illis manna ad manducandum
et panem caeli dedit eis
25 panem angelorum manducavit homo
cibaria misit eis in abundantiam
26 transtulit austrum de caelo et induxit in virtute sua africum
27 et pluit super eos sicut pulverem carnes
et sicut harenam maris volatilia pinnata
28 et ceciderunt in medio castrorum eorum circa tabernacula eorum
29 et manducaverunt et saturati sunt nimis
et desiderium eorum adtulit eis
30 non sunt fraudati a desiderio suo
adhuc escae eorum erant in ore ipsorum
31 et ira Dei ascendit in eos
et occidit pingues eorum et electos Israhel inpedivit
32 in omnibus his peccaverunt adhuc
et non crediderunt mirabilibus eius
33 et defecerunt in vanitate dies eorum
et anni eorum cum festinatione
34 cum occideret eos quaerebant eum
et revertebantur et diluculo veniebant ad Deum
35 et rememorati sunt quia Deus adiutor est eorum
et Deus excelsus redemptor eorum est
36 et dilexerunt eum in ore suo et lingua sua mentiti sunt ei
37 cor autem ipsorum non erat rectum cum eo
nec fideles habiti sunt in testamento eius
38 ipse autem est misericors et propitius fiet peccatis eorum
et non perdet eos
et abundabit ut avertat iram suam
et non accendet omnem iram suam
39 et recordatus est quia caro sunt spiritus vadens et non rediens
40 quotiens exacerbaverunt eum in deserto
in ira concitaverunt eum in inaquoso
41 et conversi sunt et temptaverunt Deum
et Sanctum Israhel exacerbaverunt
42 non sunt recordati manus eius
die qua redemit eos de manu tribulantis
43 sicut posuit in Aegypto signa sua et prodigia sua in campo Taneos
44 et convertit in sanguine flumina eorum
et imbres eorum ne biberent
45 misit in eos cynomiam et comedit eos
et ranam et disperdit eos
46 et dedit erugini fructus eorum et labores eorum lucustae
47 et occidit in grandine vineam eorum
et moros eorum in pruina
48 et tradidit grandini iumenta eorum et possessionem eorum igni
49 misit in eos iram indignationis suae
indignationem et iram et tribulationem
inmissionem per angelos malos
50 viam fecit semitae irae suae
non pepercit a morte animarum eorum
et iumenta eorum in morte conclusit
51 et percussit omne primitivum in
terra Aegypti
primitias laborum eorum in tabernaculis Cham
52 et abstulit sicut oves populum suum
et perduxit eos tamquam gregem in deserto
53 et deduxit eos in spe et non timuerunt
et inimicos eorum operuit mare
54 et induxit eos in montem sanctificationis suae
montem quem adquisivit dextera eius
et eiecit a facie eorum gentes
et sorte divisit eis terram in funiculo distributionis
55 et habitare fecit in tabernaculis eorum tribus Israhel
56 et temptaverunt et exacerbaverunt Deum excelsum
et testimonia eius non custodierunt
57 et averterunt se et non servaverunt pactum
quemadmodum patres eorum conversi sunt in arcum pravum
58 et in ira concitaverunt eum in collibus suis
et in sculptilibus suis ad aemulationem eum provocaverunt
59 audivit Deus et sprevit et ad nihilum redegit valde Israhel
60 et reppulit tabernaculum Selo
tabernaculum suum ubi habitavit in hominibus
61 et tradidit in captivitatem virtutem eorum
et pulchritudinem eorum in manus inimici
62 et conclusit in gladio populum suum et hereditatem suam sprevit
63 iuvenes eorum comedit ignis
et virgines eorum non sunt lamentatae
64 sacerdotes eorum in gladio ceciderunt
et viduae eorum non plorabuntur
65 et excitatus est tamquam dormiens Dominus
tamquam potens crapulatus a vino
66 et percussit inimicos suos in posteriora
obprobrium sempiternum dedit illis
67 et reppulit tabernaculum Ioseph
et tribum Effrem non elegit
68 et elegit tribum Iuda montem Sion quem dilexit
69 et aedificavit sicut unicornium sanctificium suum
in terra quam fundavit in saecula
70 et elegit David servum suum et sustulit eum de gregibus ovium
de post fetantes accepit eum
71 pascere Iacob servum suum et Israhel hereditatem suam
72 et pavit eos in innocentia cordis sui
et in intellectibus manuum suarum deduxit eos
1 eruditionis Asaph
ausculta populus meus legem meam
inclinate aurem vestram ad verba oris mei
2 aperiam in parabula os meum loquar enigmata antiqua
3 quae audivimus et cognovimus et patres nostri narraverunt nobis
4 non sunt abscondita a filiis eorum a generatione sequenti
narrante laudes Domini et potentiam eius
et mirabilia eius quae fecit
5 statuit contestationem Iacob et legem posuit in Israhel
quae mandavit patribus nostris ut docerent filios suos
6 ut cognosceret generatio subsequens
filii nascituri surgent et narrabunt filiis suis
7 ut ponant in Deo spem suam
et non obliviscantur cogitationum eius
et mandata eius custodiant
8 ut non sint sicut patres eorum
generatio declinans et provocans
generatio quae non praeparavit cor suum
et non credidit Deo spiritus eius
9 filii Efraim intendentes et mittentes arcum
terga verterunt in die belli
10 non custodierunt pactum Dei sui
et in lege eius noluerunt ingredi
11 et obliti sunt commutationum eius
et mirabilium eius quae ostendit eis
12 coram patribus eorum fecit mirabilia
in terra Aegypto in regione Taneos
13 divisit mare et transduxit eos
et stare fecit aquas quasi acervum
14 et duxit eos in nube per diem
et tota nocte in lumine ignis
15 scidit petram in deserto et potum dedit quasi de abyssis magnis
16 et eduxit rivos de petra et elicuit quasi flumina aquas
17 et addiderunt ultra peccare ei ut provocarent Excelsum in invio
18 et temptaverunt Deum in cordibus suis
petentes cibum animae suae
19 et loquentes contra Deum dicebant
numquid poterit Deus ponere mensam in solitudine
20 ecce percussit petram et fluxerunt aquae
et torrentes inundaverunt
numquid et panem poterit dare
aut praeparare carnem populo suo
21 ideo audivit Dominus et non distulit
et ignis accensus est in Iacob et furor ascendit in Israhel
22 quia non crediderunt Deo
nec habuerunt fiduciam in salutari eius
23 et praecepit nubibus desuper et portas caeli aperuit
24 et pluit super eos man ut comederent
et triticum caeli dedit eis
25 panem fortium comedit vir
cibaria misit eis in saturitatem
26 abstulit eurum de caelo
et induxit in fortitudine sua africum
27 et pluit super eos quasi pulverem carnes
et quasi harenam maris volatilia pinnata
28 et ceciderunt in medio castrorum eius
in circuitu tabernaculorum eius
29 et comederunt et saturati sunt nimis
et desiderium eorum adtulit eis
30 non indiguerunt de cupiditate sua
cum adhuc cibus esset in ore eorum
31 furor ergo Dei ascendit super eos
et occidit pingues eorum et electos Israhel incurvavit
32 in omnibus his peccaverunt ultra
et non crediderunt mirabilibus eius
33 et consumpsit in vanitate dies eorum et annos eorum velociter
34 si occidebat eos tunc requirebant eum
et convertebantur et diluculo consurgebant ad Deum
35 et recordabantur quia Deus fortitudo eorum
et Deus excelsus redemptor eorum
36 et lactaverunt eum in ore suo et lingua sua mentiti sunt ei
37 cor autem eorum non erat firmum cum eo
nec permanserunt in pacto eius
38 ipse vero misericors propitiabitur iniquitati et non disperdet
multumque avertit iram suam
et non suscitavit totum furorem suum
39 sed recordatus est quia caro essent spiritus vadens et non revertens
40 quotiens provocaverunt eum in deserto
adflixerunt eum in solitudine
41 et conversi sunt et temptaverunt Deum
et Sanctum Israhel concitaverunt
42 non sunt recordati manus eius
diei qua redemit eos a tribulante
43 qui fecit in Aegypto signa sua
et ostenta sua in regione Taneos
44 qui convertit in sanguine fluvios eorum
et rivos eorum ut non biberent
45 qui inmisit eis genus omne muscarum
ut comederent eos
et ranas ut disperderent eos
46 qui dedit brucho germen eorum et laborem eorum lucustae
47 qui occidit in grandine vineas eorum et sycomoros eorum in frigore
48 qui tradidit grandini pascua eorum
et iumenta eorum volucribus
49 qui misit in eos iram furoris sui
indignationem et comminationem et angustiam
inmissionem angelorum malorum
50 munivit semitam furori suo
non pepercit morti animae eorum
et animantia eorum pesti tradidit
51 et percussit omne primogenitum in Aegypto
principium partus in tabernaculis Cham
52 et tulit veluti oves populum suum
et minavit eos sicut gregem in deserto
53 et duxit eos cum fiducia et absque timore
inimicos autem eorum operuit mare
54 et adduxit eos ad terminum sanctificatum suum
montem istum quem possedit dextera eius
et eiecit a facie eorum gentes
et possidere eos fecit in funiculo hereditatem
55 et conlocavit in tabernaculis eorum tribus Israhel
56 et temptaverunt et provocaverunt Deum excelsum
et testimonia eius non custodierunt
57 et aversi sunt et praevaricati sunt ut patres eorum
incurvati sunt quasi arcus inutilis
58 et provocaverunt eum in excelsis suis
et in sculptilibus suis ad aemulandum concitaverunt
59 audivit Deus et non distulit
et proiecit vehementer Israhel
60 et reliquit tabernaculum Selo
tentorium quod conlocavit inter homines
61 tradidit in captivitatem gloriam suam
et decorem suum in manu hostis
62 et conclusit in gladio populum suum et in hereditate sua non distulit
63 iuvenes eius devoravit ignis et virgines eius nemo luxit
64 sacerdotes eius gladio ceciderunt et viduae eius non sunt
fletae
65 et evigilavit quasi dormiens Dominus
quasi fortis post crapulam vini
66 et percussit hostes suos retrorsum
obprobrium sempiternum dedit eos
67 et proiecit tabernaculum Ioseph et tribum Efraim non elegit
68 sed elegit tribum Iuda montem Sion quem dilexit
69 et aedificavit in similitudinem monoceroton
sanctuarium suum
quasi terram fundavit illud in saeculum
70 et elegit David servum suum et tulit eum de gregibus ovium
sequentem fetas adduxit eum
71 ut pasceret Iacob populum eius
et Israhel hereditatem eius
72 qui pavit eos in simplicitate cordis sui
et in prudentia manuum suarum dux eorum
fuit