1 et dices in illa die
confitebor tibi Domine quoniam iratus es mihi
conversus est furor tuus et consolatus es me
2 ecce Deus salvator meus fiducialiter agam et non timebo
quia fortitudo mea et laus mea Dominus Deus
et factus est mihi in salutem
3 haurietis aquas in gaudio de fontibus salvatoris
4 et dicetis in illa die
confitemini Domino et invocate nomen eius
notas facite in populis adinventiones eius
mementote quoniam excelsum est nomen eius
5 cantate Domino quoniam magnifice fecit
adnuntiate hoc in universa terra
6 exulta et lauda habitatio Sion
quia magnus in medio tui Sanctus Israhel
© Biblia Sacra Iuxta Vulgatam Versionem, edited by Robert Weber, Fifth Revised Edition edited by Roger Gryson, © 2007 Deutsche Bibelgesellschaft, Stuttgart. Used by permission.